Peqqissutsimik ilisimatusarneq
Kalaallit Nunaanni peqqinneq pillugu ilisimatusarneq annertuvoq, kisianni ilisimatusartut amerlanertigut Danmarkimeersuusarput nunanillu allaninngaanneersuusarlutik. Taamaattumik ilisimatusarnermi angusat Kalaallit Nunaanni innuttaasunit iluaqutigineqarnissaasa qulakkeernissaat pingaaruteqarpoq. Nunatsinnilu peqqissaasut ilisimatusartullu misilittagarineqalersunik avitseqatigineqartariaqarput. Tamanna tunngavigalugu Kalaallit Nunaanni Peqqissusermik Ilisimatusarfik pilersinneqarpoq.
Kalaallit Nunaanni Peqqissusermik Ilisimatusarfik
Peqqissaanermik ilinniarfik, Napparsimasunik paarsineq Peqqissaanermillu ilisimatusarnermik Institutti 2013-mi Ilisimatusarfiup ataani inissisimalerpoq. Kalaallit Nunaanni Peqqissusermik Ilisimatusarfimmi professorimik aamma lektorimik atorfeqartitsisoqarpoq.
Peqqissaaneq Peqqinnerlu pillugu Ilisimatusaatinik ingerlatsivik Ilisimatusarfiup ataani ingerlataasoq Peqqissaanermik ilinniakkatut ilisimatusaatitut ingerlataavoq. Ilisimatusarfimmi ilisimatusarnermut allaatigisanik allannerit, PhD pillugu aasaanerani atuarnerit Arktiske Universitet suleqatigalugu ingerlanneqartarput, taamatullu pikkorissarnerit Ilisimatusarfimmi Institutit allat Pinngortitaleriffillu suleqatigalugit ingerlanneqartarlutik.
Centeri Kalaallit Nunaata avataani Ilisimatusarfeqarfinnik ilisimatusarnermi suleqateqarnissamik isumaqatigiissuteqarpoq.
Dronning Ingridip Napparsimavissuani Nuummiilu Nakorsiartarfimmi sinerissamilu peqqissaaveqarfinni arlalinni nakorsat ilisimatusarnermik suliniutit arlallit aallartissimavaat nunatsinnilu nunanilu allani ilisimatusarnerit arlaqartut peqataaffigalugit. Peqqinnissamut tunngasunik ilisimatusarnerit amerlanerit nunat tamalaat ilisimatusarnikkut attaveqaqatigiinnerini ilisimatusarnermi suliniutinut ilaapput. Sinerissami peqqinnissaqarfimmi sulisut namminneq peqqissaaveqarfimminni napparsimavimminnilu ilisimatusarnerni peqataasarput. Ilisimatusarnerit tamakku najukkami, nuna tamakkerlugu nunallu tamalaanit peqataaffigineqartarput. Nakorsatut ilinniarsimaneq nangillugu ilisimatuutut misissuinermik sungiusarneq maanna aamma ingerlanneqarsinnaalerpoq, taamatullu nunatsinni nakorsat ilisimatuutut missuinissamut pilersaarusiaat arlallit aallartipput. PhD-tut pilersaarusiat Kalaallit Nunaanni atorfeqartunit ingerlanneqarlutik naammassineqassapput. Ukiuni kingullerni peqqissaasut ernisussiortullu ilisimatusarneq tunngavigalugu ilinniartitaanerit ilisimatusarnerillu aallartissimavaat, pingaartillugu innuttaasut peqqissuunerat.
Kalaallit Nunaanni Peqqinnissakkut ilisimatusarnermut Siunnersuisoqatigiit
Peqqinnissamut Naalakkersuisup 1996-mi novembarimi Kalaallit Nunaanni Peqqinnissakkut Ilisimatuussutsimi Ilisimatusarnermut Siunnersuisoqatigiit pilersippai Naalakkersuisunut ilaasortamut siunnersuisartuusussat, Kalaallit Nunaanni peqqinnissamut ilisimatusarneq pillugu oqallittoqalernissaanut kaammattuisartussat kiisalu suliassaqarfinni suliniuteqarnissamut toqqaasartussat.
Tamanna pillugu nittartakkami uani sukumiinerusumik takuuk: www.peqqik.gl
Nunatsinni nakorsaaneqarfik
Nunatsinni nakorsaaneqarfimmit nunami maani peqqissuseq nakkutigineqarpoq. Tamanna pisassaaq nappaatinik tunillaassortunik, kræftimik, inunngortut toqusullu allattorneqarfiini il.il. nalunaarsuinikkut. Nalunaarsuinerit peqqinnissakkut ilisimatusarnermi pingaaruteqarput.
Grønlandsmedicinsk Selskab
Grønlandsmedicinsk Selskab tassaavoq ilisimatuussutsikkut ingerlatseqatigiiffik Dansk Medicinsk Selskabip ataaniittoq. Ingerlatseqatigiiffiup ilaasortai nakorsat saniatigut tassaapput Kalaallit Nunaanni issittumilu nunap immikkoortuini allani peqqinnissakkut ilisimatusarnermik peqataasut soqutiginnittullu.
Grønlandsmedicinsk Selskab pillugu nittartakkami uani sukumiinerusumik takuuk: www.gmsnet.dk
Nuna Med
Nuna Med ilisimatuut Kalaallit Nunaanni nakorsaatinik suliaqartut ataatsimeeqatigiittarfigaat. Ataatsimeersuarneq, Nuummi ukiut pingasukkaarlugit pisarpoq, Grønlands Lægekredsforening, Grønlands Sygeplajerskeorganisation, Grønlandsmedicinsk Selskab taamatullu Kalallit Nunaanni Peqqinermut Ilisimatusarnermut Centerimit pilersaarusiorneqarlunilu ingerlanneqartarpoq.
Nuna Medimi ataatsimeersuarnissaq tulliani Nuummi 2016-imi ingerlanneqartussatut pilersaarutigineqarpoq.